अमेरिकेचे सैन्य आशियात तैनात ः चीनचा बंदोबस्त करणार

वॉशिंग्टनः   पूर्व लडाखमध्ये प्रत्यक्ष ताबा रेषेवर (LAC) भारत-चीनमध्ये तणाव सुरू आहे. दुसरीकडे दक्षिण चीन समुद्रात चीनने आक्रमक पवित्र...

वॉशिंग्टनः  पूर्व लडाखमध्ये प्रत्यक्ष ताबा रेषेवर (LAC) भारत-चीनमध्ये तणाव सुरू आहे. दुसरीकडे दक्षिण चीन समुद्रात चीनने आक्रमक पवित्रा घेतला आहे. करोना व्हायरसमुळेही चीनला जगाभरातील तीव्र टीकेचा सामना करावा लागतोय. चीनच्या अलिकडच्या हालचाली पाहता अमेरिकेने धोक्याचा इशारा दिला आहे. अमेरिकेने युरोपमधील आपले सैन्य हटवून आशियात तैनात करण्यास सुरुवात केलीय.

भारत आणि दक्षिण पूर्व आशियाला चीनचा मोठा धोका निर्माण झाला आहे. यामुळे अमेरिकेने युरोपमधील आपले सैन्य कमी केले आहे, असं अमेरिकेचे परराष्ट्र मंत्री माइक पॉम्पिओ यांनी सांगितलं. जर्मनीतील अमेरिकेचे सैन्य का कमी करण्यात आले? असा प्रश्न पॉम्पिओ यांना करण्यात आला. तेथील सैन्याच्या तुकड्या या दुसरीकडे तैनात करण्यात येत आहे, असं पॉम्पिओ यांनी स्पष्ट केलं.
 चीनच्या कम्युनिस्ट पार्टीच्या कारवाईने भारत, व्हिएतनाम, इंडोनेशिया, मलेशिया, फिलिपिन्स आणि दक्षिण चीन समुद्राला धोका आहे. आव्हानांचा सामना करण्यासाठी अमेरिकेच्या सैन्याला योग्य ठिकाणी तैनात करण्यात येत आहे, असं पॉम्पिओ म्हणाले.
फक्त अमेरिकाच नाही तर संपूर्ण जगाला चीनचा सामना करावा लागतोय. आपण या महिन्यात युरोपियन युनियनमधील परराष्ट्र मंत्र्यांशी चर्चा केलीय आणि चीनच्या कम्युनिस्ट पार्टीबाबत बरीचशी माहिती घेतली. यात चीनच्या पिपल्स लिबरेशन आर्मीकडून चिथावणीच्या घटनांचे तथ्य आहे. तसंच दक्षिण चीन समुद्रातील चीनची आक्रमकता, भारताशी घातक संघर्ष आणि शांतताप्रिय शेजाऱ्यांना धोका, अशा मुद्दांचा समावेश होता, असं अमेरिकेचे परराष्ट्र मंत्री माइक पॉम्पिओ यांनी सांगितलं.
दरम्यान, करोनाच्या मुद्यावर चीनविरोधात मोहीम सुरू करणारे अमेरिकेचे राष्ट्राध्यक्ष डोनाल्ड ट्रम्प यांनी रशियालाही अंगावर घेण्याची तयारी केली असल्याची चर्चा आहे. आगामी काळात अमेरिका आपले सैन्य पोलंडमध्ये तैनात करणार आहेत. हे सैन्य बाल्टिक समुद्र क्षेत्रात असणार आहे. त्यामुळे रशिया आणि अमेरिकेत तणाव वाढणार असल्याची चर्चा झाली आहे. रशियाचा समुद्रमार्गे सर्वाधिक व्यापार हा सेंट पीटर्सबर्ग पोर्टपासून बाल्टिक समुद्र मार्गे होतो.
विमानांनी घुसखोरी केली असल्याचा आरोप रशियाने केला होता. बाल्टिक आणि काळा समुद्रातील रशियाच्या हद्दीत अमेरिकन हवाई दलाचे बी-१ बी लाँग रेंज स्ट्रेटॅजिक बॉम्बरला रुसी हवाई दलाने पिटाळून लावले. रशियाच्या संरक्षण मंत्रालयाने या घटनेचा व्हिडिओ जाहीर केला होता. अमेरिकेचे हे घातक विमान रशियाच्या हद्दीत शिरले होते. त्यानंतर रशियन हवाई दलाने सुखोई एसयू-२७पी आणि एसयू-३० एम विमानांना पाठवले. दोन्ही विमानांनी अमेरिकन बॉम्बरचा पाठलाग करत रशियन हद्दीतून पिटाळून लावले असल्याचा दावा करण्यात आला. मात्र, त्यावर अमेरिकेने काहीही प्रतिक्रिया दिली नव्हती.